म,
हराउँदै छु
डुब्दै छु
विलयको मुखको नजिक छु
महाप्रलयको भुमरीमा छु
र त म आज, म सँगै हार्दै छु ।

मेरा सपनाहरू कुहिँदै छन्,
सपनाका गन्धहरू चारैतिर छरपस्ट छन्
भाग्दा, हिँड्दा, घस्रँदा, बामे सर्दा पनि
न मेरो सपनासम्म पुगे
न मेरो सपनामा एक चिम्टी सास नै भर्न सके
सके त केबल सपना तुहाउन!
कठै म !

मेरा प्रेमिला भावहरू हराउँदै गए
भावना मर्‍यो
प्रेमले आत्महत्या गर्‍यो
सहानुभूतिमा डढेलो लागो
मन भुतभुते खरानी झैँ भयो
र त आज एक्लो भएको छु
अनि एक्लै जल्दै छु !

ऋण लाग्यो
दिन पनि लाग्यो
साथीहरूले बाटो मोडे
आफन्त नारा लगाउँदै छन्
छिमेकी खित्का छोड्छ
शत्रुहरू भोज गर्दैछन् अरे
अनि म इज्जतको लिलामीको भाउ खादै छु
कठै म ! …………

मर्दा मलामी पाउँदिन मैले
कतिलाई बदनियत धोका दिए
कतिको उधारो वचन बाँकी छ,
गुन लगाएका जति बैगुनी भइसके!
छिमेकी आँखा तर्छन्
आफन्तहरू टेका लगाएर राख्या छु
र त एक टुक्रो दाउरा,
एक अँजुली पानी हाल्ने कोही छैनन्
कठै म !


आज सन्सार नै विलयको भावमा डुबिरहेको छु
न त भित्रको म जिउँदै छ,
न त मेरा सपना जीवित छ,
न मेरा भावना मुर्छित छ,
न मेरा इज्जत बाँकी छ

बाँकी छन् त केबल
एक थान जिजीविषा
एक थान बेइमानीको नामाकरण
एक सर्को सास
अनि एउटा जिउँदो लास
कठै म !

प्रतिक्रिया

सम्बन्धित खवर

ताजा समाचार

लोकप्रिय